Aatsitassanik Suliassaqarfinnut Avatangiisinut Aqutsisoqarfimmik ilisaritsitsineq

Aqutsisoqarfimmi pisortap Najaaraq Demant-Poortip Aatsitassanik Suliaqarfinnut Avatangiisinut Aqutsisoqarfiup suliarisartagaasa inatsisitigut tunngavii aamma suleqatigiinnissamik isumaqatigiissut, Avatangiisinik Aqutsisoqarfiup Nationalt Center for Miljø og Energimik (DCE) Pinngortitaleriffimmillu (GN) suleqateqarnissaanut tunngaviusoq, ilanngullugu saqqummiuppai.

Avatangiisinik Aqutsisoqarfiup ingerlatseqatigiiffiit aatsitassarsiornermik suliaqartarnerisa avatangiisinut sunniutigisartagaannut tunngasut arlaannaannulluunnit attuumassuteqanngitsumik ilisimatuussutsikkut siunnersortit Pinngortitaleriffimmeersut (GN) Nationalt Center for Miljø og Energimeersullu (DCE) peqatigalugit oqartussaasutut suliaqartarnerit isumagisarpai.

Suleqatigiinnerup aatsititassanut inatsisip piumasaqatai Aatsitassanut Oqartussaasut avatangiisinut tunngassuteqartut pillugit naliliineri aalajangiinerilu arlaannaannulluunniit attuumassuteqanngitsumik ilisimatuussutsikkut ingerlatsiffiup ataatsip arlallilluunniit nalilersuinerannit aalajangiinissamullu siunnersuutaannit aallaaveqartumik tunngaveqarlutik ingerlanneqassanerannut tunngasut (Aatsitassanut inatsit par. 3 a, imm. 4) piviusunngortippai.

Aqutsisoqarfimmi pisortap Najaaraq Demant-Poortip Avatangiisinut Aqutsisoqarfiup aatsitassanut inatsimmi immikkoortut avatangiisinut tunngasut naapertorlugit aatsitassarsiornermik sulianik nakkutiginnittarnera saqqummiuppaa. Avatangiisit pillugit piumasaqaatit ilaatigut imaqarput avatangiisinut akornusiisinnaasunik aniatsitsisinnaanerit minnerpaaffissaanniitsinniarlugit periuseq avatangiisinut pitsaanerpaaq aamma teknikki/atortorissaarutit pissarsiarineqarsinnaasoq pitsaanerpaaq atorneqassasoq.

Pinaveersaartitsineq ukkatarineqarpoq killissarititanik atuinikkut avatangiisinut sunniutaasinnaasut killilersorneqarlutik pitsaasumillu avatangiisit eqqarsaatigalugit periuseqarnissamut iluaqutaallutik. Avatangiisinut Aqutsisoqarfiup avatangiisit pillugit piumasaqaasiortuuvoq aatsitassanillu piiaanerit aallartinnginnerini, aatsitassarsiornerup nalaani, kiisalu aamma aatsitassarsiornermik suliat unitsinneqareernerisa kingornatigut piumasaqaatit malinneqarnissaannik nakkutiginnittuulluni.

Ilisimatuussutsikkut siunnersorti Christian Junker Jørgensenip killissarititanik atuinerup avatangiisinik mingutsitsinermik qanoq killillersuisarnera nassuiaatigaa. Killissarititat tassaapput silaannarmut imermullu - avatangiisinut - mingutsitsisinnaasunik aniatitsisinnaanerup annertussussaasa killingat.